طفلي اللي ساكن في حشايا من سنين
بيدق علي بابي الحزين
بيقولى يامى طالت غربتي
م تخرجيني طال الانين
ياابنى يا متلفح بحزن واسي
عايز لى تخرج للحياة
وزمنا تاه
م عادشى زمان الطيبين
خليك هنا جوه حضنى مليون سنة
ماتفتكرش الدنيا مليانة الهنا
ماتفتكرش انى اللى حبساك جوايا انا
زمنا زمان المتوحشين
وماعادشى باقي حنينين
لو جيت هنا لدنيا الوجع
راح تلقي كل الدنيا ضلمة
رغم ان الشمس وسط السما
والناس حوالينا متبسمين
خليك هنا وان عشت جوايا ميت سنة
م ح تلقي امان غير هنا
ولا حنان غير هنا
ولا البشر هيكونوا بشر
ولا انا هاكون انا
صدقنى يا ابنى الناس هنا
زى الغيلان متوحشين
الناس هنا مش طيبين
بعيون ازاز وميتين
خليك هنا واحلم معايا والسلام
كان نفسي يا بنى
تكون لى ضلع وسط الضلوع
عُجاز يسندني م الوقوع
بس التمنى مش كفاية
خليك هنا وموت جوايا
اوعى الخروج مالوش رجوع
مالوش رجوع
ليست هناك تعليقات:
إرسال تعليق