قلمي الرصاص
بتتولد معاه أحلام كتيرة وممكنة
بلف بيه ساعات كتير ف الأزمنة
قلم بيعشق الكلام
قلم بيحضن ف الكلام
يحفر يخربش ضحكتي
يرسم معالم فرحتي
ف لوحة فاضية ومبهمة
زهور بترقص جوة حضني
وألم بينزف بين ضلوعي
ارسم ف توبي الروز وأنا
فرحانة بيه
يجرى يشخبط فرحتي
يمسح بقوة بسمتي وتترسم
شفا مسروق منها الكلام
انسان وحيد وجوه ضلعه زحام
قلمي الرصاص كاره لكل الألوان
عاشق يعيش جوه الضلام
قلمي الرصاص قلم حزين
دايما بيرسم في وشوش معجونة أنين
وعيون من الحياة خاليين
قلمي بيحلم بالتمرد بين ضلوعي
وفجاة وسط الحلم دة سنــــــُه انكسر
اااه
قلمي انكسر
قلمي الرصاص لما انكسر
وقفت أسأل القدر
هوة انكسر واللا أنقتل؟
والخط اللي واقف ما اكتمل
سهم صايب الفؤاد
بحرف واحد من سكات
حرف لأسمي واقف حزين
والتاني ليه وسط الضلام؟؟!!
قلمي ف لحظة الاحتضار
نسي يقولي
مين صابه مين
قلمي الحزين
تسمحلي تاني ارجع أبريك
ومن قوتي أهديك
ارجع اشخبط رسمتي
وأطلقك وأحميك
ترسم خطوط جوة الفضا
طيور بعيد متحررة
وزهور جميلة ومزهرة
ولماتدخل في خطوط الوش
ترسم وشوش متبسمة
وايدين حبايب مشبكة
عيون على نور الوجود
غير مبهمة
واحلام كتيرة وممكنة
ليست هناك تعليقات:
إرسال تعليق